खालापूर: बेधडक महाराष्ट्र
खालापूर तालुक्यातील पत्रकारितेच्या क्षेत्रात सातत्याने कार्यरत असलेले ज्येष्ठ पत्रकार दीपक मारुती जगताप यांना “उत्कृष्ट पत्रकार” हा मानाचा रायगड जिल्हा पुरस्कार जाहीर करण्यात आला आहे. अनेक वर्षांपासून प्रामाणिक, निडर आणि समाजहिताची पत्रकारिता करत त्यांनी आपली वेगळी ओळख निर्माण केली आहे. त्यांच्या या कार्याची दखल घेत हा प्रतिष्ठेचा पुरस्कार जाहीर करण्यात आल्याने खालापूर तालुक्यासह संपूर्ण रायगड जिल्ह्यात आनंदाचे वातावरण आहे.
दीपक जगताप हे खालापूर तालुक्याचे रहिवासी असून त्यांनी स्थानिक पातळीवरील प्रश्नांना नेहमीच वाचा फोडली आहे. ग्रामीण भागातील समस्या, नागरिकांच्या अडचणी, सामाजिक प्रश्न आणि प्रशासनातील त्रुटी यांना त्यांनी आपल्या लेखणीतून प्रभावीपणे मांडले आहे. त्यांच्या वृत्तांकनामुळे अनेक प्रश्नांना न्याय मिळाला असून प्रशासनालाही कार्यवाही करण्यास भाग पाडले आहे. त्यामुळे पत्रकार म्हणून त्यांच्यावर नागरिकांचा मोठा विश्वास आहे.
पत्रकारिता ही केवळ बातम्या देण्यापुरती मर्यादित नसून समाजाच्या विकासासाठी मार्गदर्शक ठरावी, या उद्देशाने त्यांनी काम केले आहे. सत्य आणि निष्पक्षतेला प्राधान्य देत त्यांनी आपल्या कार्यातून पत्रकारितेचा आदर्श ठेवला आहे. याच कार्याची दखल घेत “उत्कृष्ट पत्रकार” हा रायगड जिल्हा पुरस्कार त्यांना जाहीर करण्यात आला आहे.
दरम्यान, हा पुरस्कार साईबाबा मंदिर साईधाम, बिजघर (ता. खेड, जि. रत्नागिरी) येथे आयोजित करण्यात आलेल्या ३० व्या वर्धापन दिनानिमित्त होणाऱ्या विशेष कार्यक्रमात प्रदान करण्यात येणार आहे. रविवार दिनांक १० मे २०२६ रोजी हा सोहळा मान्यवरांच्या उपस्थितीत पार पडणार आहे.
या कार्यक्रमानिमित्त श्री सत्यनारायणाची महापूजा तसेच राष्ट्रीय पुरस्कार वितरण सोहळ्याचे आयोजन करण्यात आले आहे. विविध क्षेत्रातील उल्लेखनीय कार्य करणाऱ्या मान्यवरांचा यावेळी सन्मान करण्यात येणार आहे. दीपक जगताप यांना मिळणारा “उत्कृष्ट पत्रकार” पुरस्कार हा या सोहळ्याचा आकर्षण ठरणार आहे.
या भव्य कार्यक्रमाचे आयोजन साईबाबा मंदिर, बिजघरचे प्रवर्तक श्री सदानंदराव नारायणराव भोसले यांच्या मार्गदर्शनाखाली करण्यात आले आहे. तसेच मराठा क्रांती स्वराज्य संघटनेचे राष्ट्रीय अध्यक्ष विजयराव कदम, राष्ट्रीय सरचिटणीस प्रदीपभाई मोरे, राज्य अध्यक्ष गुरुनाथ यशवंतराव, राज्य सरचिटणीस प्रकाशराव चव्हाण, मुंबई प्रदेश अध्यक्ष डॉ. चंद्रकांत मोजाड, राष्ट्रीय मीडिया अध्यक्ष अभिजीत दरेकर, कोकण प्रदेश अध्यक्ष महेंद्र भोसले, रत्नागिरी जिल्हा संपर्क प्रमुख महेश मोरे, जिल्हाध्यक्ष कृष्णा शेलार आणि खेड तालुका अध्यक्ष श्रीराम कदम यांची प्रमुख उपस्थिती राहणार आहे.
