खेड येथील प्रख्यात “आपला बाजार”चे मालक उद्योजक संदीप वसंत नायकवडी यांना “उद्योगरत्न पुरस्कार” जाहीर – प्रदीपभाई मोरे

खेड (प्रतिनिधी) : बेधडक महाराष्ट्र
मराठा क्रांती स्वराज्य संघटनेच्या वतीने यंदाचा मानाचा “उद्योगरत्न पुरस्कार” खेड येथील प्रसिद्ध व्यावसायिक व “आपला बाजार”चे मालक उद्योजक संदीप वसंत नायकवडी यांना जाहीर करण्यात आला आहे. या पुरस्काराची घोषणा मराठा क्रांती स्वराज्य संघटनेचे राष्ट्रीय संस्थापक अध्यक्ष सदानंदराव भोसले, राष्ट्रीय अध्यक्ष विजयराव कदम (सुरत), राष्ट्रीय सरचिटणीस प्रदीपभाई मोरे (बडोदा), महाराष्ट्र राज्य अध्यक्ष गुरुनाथ यशवंतराव, राज्य सरचिटणीस प्रकाशराव चव्हाण तसेच दैनिक बेधडक महाराष्ट्रचे संपादक, मुद्रक व प्रकाशक अभिजीत दरेकर आणि राष्ट्रीय रोजगार उद्योग विभाग अध्यक्ष अजय तिडके यांच्या सूचनेनुसार करण्यात आली आहे.
उद्योजक संदीप वसंत नायकवडी हे मूळचे देवई, ता. वाळवा (ईश्वरपूर), जि. सांगली येथील असून त्यांची कर्मभूमी रत्नागिरी जिल्ह्यातील खेड आहे. त्यांनी आपल्या कुटुंबीयांच्या आशीर्वादाने व विशेषतः मा. आमदार मानसिंगराव नाईक तसेच दीनकर (बापू) नायकवडी (बत्तीस शिराळा) यांच्या प्रेरणेतून व्यवसाय क्षेत्रात पाऊल ठेवले.
दि. 20 ऑगस्ट 2000 रोजी खेड कोटीजवळ अत्यंत छोट्या स्वरूपात “आपला बाजार” या नावाने त्यांनी व्यवसायाची सुरुवात केली. सुरुवातीच्या काळात मर्यादित साधनसामग्री असतानाही त्यांनी प्रामाणिकपणा, ग्राहकसेवा आणि दर्जेदार माल यावर भर देत व्यवसाय वाढवला. त्यानंतर 2002 साली पोलीस स्टेशनसमोर नवीन शाखा सुरू करण्यात आली आणि व्यवसायाचा विस्तार अधिक मजबूत झाला.
सध्या 2026 मध्ये पंचायत समिती समोर “आपला बाजार”चे भव्य स्वरूपात नवे दालन सुरू करण्यात आले आहे. गेल्या 25 वर्षांपासून “आपला बाजार” खेड तालुक्यातील नागरिकांच्या सेवेत अखंडपणे कार्यरत असून, या प्रवासात अनेक चढ-उतार आले तरीही त्यांनी प्रत्येक परिस्थितीवर मात करून व्यवसाय यशस्वीपणे पुढे नेला आहे.
“उच्च प्रतीचा दर्जेदार माल व विनम्र तत्पर सेवा” हे ब्रीदवाक्य समोर ठेवून “आपला बाजार”ने ग्राहकांचा विश्वास संपादन केला आहे. आज खेड परिसरात हा ब्रँड घराघरात परिचित झाला असून, नागरिकांचा प्रचंड प्रतिसाद मिळत आहे.
मराठा क्रांती स्वराज्य संघटनेच्या वतीने देण्यात येणारा “उद्योगरत्न पुरस्कार” हा उद्योग क्षेत्रातील उल्लेखनीय योगदानासाठी दिला जातो. संदीप नायकवडी यांनी स्थानिक पातळीवर व्यवसाय वाढवत रोजगारनिर्मिती, ग्राहकसेवा आणि सामाजिक बांधिलकी जपल्यामुळे त्यांची या पुरस्कारासाठी निवड करण्यात आली आहे.
या घोषणेनंतर खेड परिसरात आनंदाचे वातावरण निर्माण झाले असून विविध सामाजिक व व्यावसायिक क्षेत्रातून त्यांच्यावर शुभेच्छांचा वर्षाव होत आहे. स्थानिक व्यापारी, नागरिक व मित्रपरिवार यांनीही त्यांच्या यशाचे कौतुक केले आहे.
या पुरस्कार वितरण सोहळ्यात मराठा क्रांती स्वराज्य संघटनेचे पदाधिकारी, उद्योजक तसेच सामाजिक क्षेत्रातील मान्यवर उपस्थित राहणार आहेत. संदीप नायकवडी यांच्या कार्याचा गौरव करून त्यांना पुढील व्यवसाय विस्तारासाठी प्रेरणा देण्यात येणार आहे.
एकंदरीत, खेड येथील “आपला बाजार”चे संदीप वसंत नायकवडी यांचा 25 वर्षांचा व्यवसाय प्रवास हा चिकाटी, प्रामाणिकपणा आणि ग्राहकसेवेचा उत्तम नमुना असून, “उद्योगरत्न पुरस्कार” हा त्यांच्या यशस्वी वाटचालीचा सन्मान ठरत आहे.