गोपालनगर कोकण विकास मंडळ नवसारी यांनी उभारलेले दत्त मंदिर भाविकांचे श्रद्धास्थान – सदानंदराव भोसले
नवसारी : बेधडक महाराष्ट्र
नवसारी जिल्ह्यातील गोपालनगर विजलपोर येथे कोकण विकास मंडळाच्या वतीने उभारण्यात आलेले भव्य दत्त मंदिर हे आज परिसरातील भाविकांचे एक प्रमुख श्रद्धास्थान बनले आहे. या मंदिरासोबतच तळ मजल्यावर मराठा बांधवांसाठी एक सुसज्ज समाज हॉलही बांधण्यात आला असून, सामाजिक एकोपा आणि धार्मिक श्रद्धेचे उत्तम उदाहरण या ठिकाणी पाहायला मिळते.
या मंदिराचे उद्घाटन काही वर्षांपूर्वी ज्येष्ठ संत खोपोलीचे गगनगिरी महाराज यांच्या पवित्र हस्ते मोठ्या भक्तिभावात पार पडले होते. विशेष म्हणजे, त्या वेळेस गगनगिरी महाराज यांना खोपोली येथून अंबानी यांच्या हेलिकॉप्टरने आणण्यात आल्याची माहिती आयोजकांकडून देण्यात आली होती. तसेच या भव्य उद्घाटन सोहळ्याचे आयोजन सुरतचे खासदार सी. आर. पाटील यांच्या सौजन्याने करण्यात आले होते. त्यामुळे हा कार्यक्रम केवळ धार्मिकच नव्हे तर सामाजिक दृष्ट्याही अत्यंत महत्त्वाचा ठरला होता.
आज या दत्त मंदिर व समाज हॉलची पाहणी मराठा क्रांती स्वराज्य संघटना राष्ट्रीय संस्थापक अध्यक्ष सदानंदराव भोसले यांच्या हस्ते करण्यात आली. या वेळी त्यांनी मंदिर परिसराची पाहणी करून कोकण विकास मंडळाच्या कार्याचे मनापासून कौतुक केले. त्यांनी नवसारीतील सर्व बांधवांचे आभार मानत सांगितले की, अशा प्रकारची धार्मिक स्थळे समाजाला एकत्र आणण्याचे कार्य करतात आणि समाजातील एकोपा वाढवतात.
भोसले यांनी या वेळी मंदिर व्यवस्थापन व समाज हॉलच्या सुविधांचीही माहिती घेतली. त्यांनी भाविकांसाठी उपलब्ध असलेल्या सोयी-सुविधांचे कौतुक केले आणि पुढील काळात अशा उपक्रमांना अधिक बळ मिळावे, अशी अपेक्षा व्यक्त केली.
या कार्यक्रमास अनेक मान्यवर उपस्थित होते. यामध्ये रविंद्र जाधव, विजय शिंदे, शैलेश कदम, संजय आंब्रे, गुरुदत्त साटम, दत्तात्रय शिंदे, सुदाम शिंदे, मोरे यांच्यासह अनेक पदाधिकारी व विश्वस्त मंडळी उपस्थित होती. सर्वांनी मंदिर व्यवस्थापनाच्या कार्याचे अभिनंदन केले आणि भविष्यात समाजोपयोगी उपक्रम अधिक व्यापक करण्याचा निर्धार व्यक्त केला.
गोपालनगर येथील हे दत्त मंदिर आज केवळ धार्मिक स्थळ राहिले नसून, ते सामाजिक एकात्मतेचे प्रतीक बनले आहे. कोकण विकास मंडळाने उभारलेला समाज हॉल हा विविध सामाजिक, सांस्कृतिक व धार्मिक कार्यक्रमांसाठी उपयोगी पडत असून, स्थानिक समाजाला एकत्र आणण्याचे महत्त्वाचे केंद्र म्हणून तो विकसित झाला आहे.
या संपूर्ण उपक्रमामुळे नवसारी परिसरात धार्मिक श्रद्धा, सामाजिक एकोपा आणि सांस्कृतिक परंपरा यांचा सुंदर संगम पाहायला मिळत आहे. स्थानिक नागरिकांनी देखील या उपक्रमाचे स्वागत करत कोकण विकास मंडळाचे आभार मानले आहेत.
