सुरत येथील उद्योजक विजयराव कदम यांच्या समाजकार्याची दखल; “समाज रत्न” पुरस्कार जाहीर – प्रा. संध्याताई राणे
पुणे : बेधडक महाराष्ट्र
समाजातील वंचित, गरजू आणि दुर्बल घटकांसाठी निस्वार्थीपणे कार्य करणाऱ्या व्यक्तींचा गौरव करणे ही समाजाच्या प्रगतीसाठी अत्यंत महत्त्वाची बाब आहे. अशाच एका समाजाभिमुख व्यक्तिमत्त्वाचा सन्मान करण्याचा निर्णय मराठा क्रांती स्वराज्य संघटनेने घेतला असून, सुरत येथील प्रख्यात उद्योजक विजयराव कदम यांना सन २०२४-२५ चा मानाचा “राष्ट्रीय समाज रत्न” पुरस्कार जाहीर करण्यात आला आहे. ही माहिती संघटनेच्या राष्ट्रीय महिला अध्यक्षा प्रा. सौ. संध्याताई राणे यांनी दैनिक बेधडक महाराष्ट्र प्रतिनिधीशी बोलताना दिली.
मराठा क्रांती स्वराज्य संघटना, जी भारत सरकार मान्यता प्राप्त संस्था आहे, स्थापनेपासून समाजहिताचे अनेक उपक्रम राबवत आहे. या संस्थेचे संस्थापक सदस्य म्हणून विजयराव कदम यांनी सुरुवातीपासूनच संघटनेच्या कार्यात सक्रिय सहभाग नोंदवला आहे. संघटनेचे आधारवड म्हणून ओळखले जाणारे कदम यांनी सामाजिक, शैक्षणिक आणि आर्थिक स्तरावर अनेक उपक्रम राबवून गरजू नागरिकांना मदतीचा हात दिला आहे. त्यांच्या या सातत्यपूर्ण कार्याची दखल घेत हा प्रतिष्ठेचा पुरस्कार जाहीर करण्यात आला आहे.
विजयराव कदम हे केवळ उद्योजक म्हणूनच नव्हे तर समाजसेवक म्हणूनही ओळखले जातात. त्यांनी आपल्या उद्योगातून मिळणाऱ्या उत्पन्नाचा काही हिस्सा समाजहितासाठी खर्च करत विविध सामाजिक उपक्रमांना चालना दिली आहे. गरीब कुटुंबांना आर्थिक मदत, विद्यार्थ्यांना शैक्षणिक सहाय्य, आरोग्य शिबिरांचे आयोजन, तसेच आपत्तीग्रस्तांना तातडीची मदत देणे अशा अनेक उपक्रमांमध्ये त्यांचा सक्रिय सहभाग राहिला आहे. त्यामुळेच समाजात त्यांना “गरिबांचे कैवारी” म्हणून मान मिळाला आहे.
या पुरस्काराची घोषणा करताना प्रा. संध्याताई राणे यांनी सांगितले की, “समाजासाठी निस्वार्थ भावनेने कार्य करणाऱ्या व्यक्तींना प्रोत्साहन देणे ही संघटनेची परंपरा आहे. विजयराव कदम यांनी केलेले कार्य प्रेरणादायी असून, त्यांच्या कार्याचा सन्मान म्हणून ‘समाज रत्न’ पुरस्कार जाहीर करण्यात आला आहे.”
या निर्णयामागे संघटनेतील विविध पदाधिकाऱ्यांचा मोलाचा सहभाग आहे. मराठा क्रांती स्वराज्य संघटनेचे राष्ट्रीय संस्थापक अध्यक्ष सदानंदराव भोसले, राष्ट्रीय संस्थापक सदस्य व बडोदे येथील उद्योजक प्रदीप मोरे, राज्य अध्यक्ष गुरुनाथ यशवंतराव, राज्य सरचिटणीस प्रकाशराव चव्हाण, तसेच राष्ट्रीय मीडिया अध्यक्ष व दैनिक बेधडक महाराष्ट्रचे संपादक, न्यूज नेटवर्कचे मालक, मुद्रक व प्रकाशक अभिजित दरेकर, राष्ट्रीय रोजगार व उद्योग विभाग अध्यक्ष उद्योजक अजय तिडके यांच्या सूचनेनुसार हा निर्णय घेण्यात आला असल्याचेही राणे यांनी स्पष्ट केले.
हा “राष्ट्रीय समाज रत्न” पुरस्कार सोहळा लवकरच भव्य स्वरूपात आयोजित करण्यात येणार असून, विविध मान्यवरांच्या उपस्थितीत विजयराव कदम यांचा सन्मान करण्यात येणार आहे. या सोहळ्याची तारीख व ठिकाण लवकरच जाहीर करण्यात येईल, अशी माहितीही संघटनेतर्फे देण्यात आली आहे.
समाजासाठी समर्पित भावनेने काम करणाऱ्या व्यक्तींचा सन्मान केल्याने समाजात सकारात्मक ऊर्जा निर्माण होते आणि इतरांनाही समाजकार्य करण्याची प्रेरणा मिळते. विजयराव कदम यांना जाहीर झालेला “समाज रत्न” पुरस्कार हा त्यांच्या कार्याचा योग्य गौरव असून, त्यांच्या पुढील सामाजिक वाटचालीसाठी तो नक्कीच प्रेरणादायी ठरेल, असा विश्वास व्यक्त होत आहे.
