आमदार महेंद्र थोरवे व आरोग्यमंत्री प्रकाश आबिटकर यांचे शासकीय ओएसडी स्वप्नील सांगळे यांचा कर्जत उपजिल्हा रुग्णालयाला पाहणी दौरा
कर्जत | बेधडक महाराष्ट्र
कर्जत विधानसभा मतदारसंघाचे आमदार महेंद्र थोरवे तसेच राज्याचे आरोग्यमंत्री प्रकाश आबिटकर यांचे शासकीय विशेष कार्य अधिकारी (ओएसडी) स्वप्नील सांगळे यांनी कर्जत येथील शासकीय उपजिल्हा रुग्णालयाला संयुक्त भेट देत रुग्णालयाच्या कामकाजाचा सविस्तर आढावा घेतला. सर्वसामान्य नागरिकांना अधिक दर्जेदार, सुलभ व प्रभावी आरोग्यसेवा मिळावी, या उद्देशाने हा पाहणी दौरा आयोजित करण्यात आला होता.
यावेळी आमदार महेंद्र थोरवे आणि स्वप्नील सांगळे यांनी रुग्णालयातील बाह्यरुग्ण विभाग (ओपीडी), आंतररुग्ण विभाग, आपत्कालीन सेवा, प्रसूती कक्ष, औषध वितरण केंद्र, प्रयोगशाळा तसेच इतर विविध विभागांना भेट देऊन तेथील सुविधा प्रत्यक्ष पाहिल्या. रुग्णालयात उपचारासाठी येणाऱ्या रुग्णांची संख्या, उपलब्ध वैद्यकीय सुविधा, आवश्यक औषधांचा साठा, आधुनिक उपकरणांची उपलब्धता तसेच रुग्णांना मिळणाऱ्या सेवांबाबत सविस्तर माहिती त्यांनी संबंधित अधिकाऱ्यांकडून जाणून घेतली.
पाहणीदरम्यान डॉक्टर, वैद्यकीय अधिकारी, परिचारिका आणि इतर कर्मचाऱ्यांशी संवाद साधत रुग्णालयाच्या दैनंदिन कामकाजाचा आढावा घेण्यात आला. उपचार प्रक्रियेत येणाऱ्या अडचणी, मनुष्यबळाची उपलब्धता, आवश्यक वैद्यकीय साधनसामग्री तसेच भविष्यातील गरजांबाबत चर्चा करण्यात आली. रुग्णालय प्रशासनाने विविध योजनांची अंमलबजावणी, रुग्णसंख्या आणि उपलब्ध सुविधांची माहिती यावेळी सादर केली.
यावेळी आमदार महेंद्र थोरवे यांनी रुग्णालयात येणाऱ्या प्रत्येक नागरिकाला वेळेत व गुणवत्तापूर्ण उपचार मिळणे अत्यंत आवश्यक असल्याचे सांगितले. औषधांचा पुरेसा साठा, स्वच्छता, शिस्तबद्ध सेवा आणि रुग्णांशी संवेदनशीलतेने वागण्यावर विशेष भर देण्याच्या सूचना त्यांनी संबंधित अधिकाऱ्यांना दिल्या. रुग्णालयातील आवश्यक सुविधा वाढविण्यासाठी शासन स्तरावर सातत्याने पाठपुरावा करण्यात येईल, अशी ग्वाहीही त्यांनी दिली.
आरोग्यमंत्री प्रकाश आबिटकर यांचे शासकीय ओएसडी स्वप्नील सांगळे यांनीही रुग्णालयातील कामकाजाबाबत समाधान व्यक्त करत काही आवश्यक सुधारणा तातडीने करण्याच्या सूचना दिल्या. नागरिकांना अधिक चांगल्या आरोग्य सुविधा उपलब्ध करून देण्यासाठी शासन कटिबद्ध असून रुग्णालयाच्या विकासासाठी आवश्यक त्या सर्व बाबी शासनापर्यंत पोहोचविल्या जातील, असे त्यांनी सांगितले.
पाहणीदरम्यान काही रुग्ण व त्यांच्या नातेवाईकांशी संवाद साधून त्यांना मिळणाऱ्या उपचारांबाबत अभिप्रायही घेण्यात आला. रुग्णांच्या अडचणी जाणून घेत त्या तातडीने सोडविण्यासाठी प्रशासनाने कार्यवाही करावी, असे निर्देश देण्यात आले.
या संयुक्त पाहणी दौऱ्यामुळे कर्जत उपजिल्हा रुग्णालयातील आरोग्य सेवांचा प्रत्यक्ष आढावा घेण्यात आला असून, भविष्यात रुग्णालयातील सुविधा अधिक सक्षम करण्यासाठी आवश्यक उपाययोजना करण्यात येणार असल्याची अपेक्षा व्यक्त केली जात आहे.
