बिजघर: बेधडक महाराष्ट्र
ता. खेड, जि. रत्नागिरी येथील श्री स्वयंभू शंकर पार्वती काळकाई मानाई मंदिर येथे महाशिवरात्री उत्सव २०२६ निमित्ताने दोन दिवसीय धार्मिक व सांस्कृतिक कार्यक्रमांचे आयोजन करण्यात आले आहे. रविवार दि. १५ व सोमवार दि. १६ फेब्रुवारी २०२६ रोजी हा उत्सव मोठ्या भक्तीभावाने आणि उत्साहात साजरा करण्यात येणार असून, आयोजक ‘आम्ही बिजघरकर’ व समस्त ग्रामस्थांनी भाविकांना उपस्थित राहण्याचे आवाहन केले आहे.
सालाबादप्रमाणे यंदाही भक्ती आणि शक्तीच्या अनोख्या संगमातून महाशिवरात्री उत्सव साजरा केला जाणार आहे. मंदिर हे ग्रामदैवत म्हणून प्रसिद्ध असून, स्वयंभू शंकर-पार्वती, काळकाई व मानाई यांच्या पवित्र सान्निध्यात हा उत्सव पार पडतो. कोकणासह राज्यातील विविध जिल्ह्यांतून भाविक मोठ्या संख्येने येथे दर्शनासाठी येत असतात. काही भक्त नवस बोलण्यासाठी तर काही नवस फेडण्यासाठी मंदिरात हजेरी लावतात.
रविवार दि. १५ फेब्रुवारी रोजी सकाळी ६ वाजता अभिषेकाने कार्यक्रमाची सुरुवात होईल. दुपारी २ ते ५ या वेळेत मुलांसाठी विविध स्पर्धा कार्यक्रमांचे आयोजन करण्यात आले आहे. सायंकाळी ६.३० ते ७.३० या वेळेत बिजघर (सुतारवाडी) हरिपाठ भजन होणार असून भक्तीमय वातावरण निर्माण होईल. रात्री ८.३० ते ११.३० या वेळेत कोकणातील पारंपरिक ‘बहुरंगी नमन’ तसेच गण-मीळण कार्यक्रम रंगणार आहे. त्यानंतर रात्री ११.३० वाजता पूजा व महाआरती होणार आहे. सकाळी ९.३० ते १० या वेळेत शिवप्रतिमेचे पूजन होईल, तर सकाळी १० ते १२ या वेळेत महिलांसाठी हळदी-कुंकू समारंभ आयोजित करण्यात आला आहे. दुपारी १ ते २.३० या वेळेत महाप्रसादाचे वितरण केले जाईल.
सोमवार दि. १६ फेब्रुवारी रोजीही धार्मिक कार्यक्रमांची सांगता भक्तिभावात होणार आहे. शिवप्रतिमेचे विशेष पूजन, महिलांसाठी पारंपरिक हळदी-कुंकू समारंभ आणि महाप्रसादाचा लाभ भाविकांना घेता येणार आहे. संपूर्ण दोन दिवस गावातील सर्व ग्रामस्थ उत्सवासाठी एकत्र येऊन नियोजन व व्यवस्था पाहणार आहेत.
मंदिर परिसरात स्वच्छता, शिस्त आणि भाविकांच्या सोयीसुविधांची विशेष काळजी घेण्यात येत आहे. दर्शनासाठी येणाऱ्या भाविकांनी शिस्त राखावी तसेच तीर्थ-प्रसादाचा लाभ घ्यावा, असे आवाहन आयोजकांनी केले आहे. देणगी अथवा वस्तूरूपात भंडाऱ्यासाठी योगदान देऊ इच्छिणाऱ्या भक्तांनी आयोजकांशी संपर्क साधावा, अशी विनंतीही करण्यात आली आहे.
बिजघर ग्रामस्थ व भक्तगणांच्या संयुक्त प्रयत्नांतून साजरा होणारा हा महाशिवरात्री उत्सव कोकणातील धार्मिक व सांस्कृतिक परंपरेचे जतन करणारा ठरत आहे. भक्ती, परंपरा आणि एकात्मतेचा संदेश देणारा हा सोहळा मोठ्या उत्साहात पार पडणार असून, परिसरातील भाविकांसाठी तो विशेष आकर्षण ठरणार आहे.
