कर्जत : ग्रामीण भागातील विद्यार्थ्यांना शिक्षणासाठी आवश्यक शैक्षणिक साहित्य उपलब्ध व्हावे आणि आर्थिक परिस्थितीमुळे त्यांच्या शिक्षणात अडथळे निर्माण होऊ नयेत, या उद्देशाने सद्भाव फाऊंडेशन, मुंबई यांच्या वतीने प्राथमिक शाळांमधील विद्यार्थ्यांना मोफत शैक्षणिक साहित्य व दप्तरांचे वाटप करण्यात आले. दिनांक २४ ऑगस्ट २०२६ रोजी विविध प्राथमिक शाळांमध्ये हा उपक्रम उत्साहात पार पडला.
झुंगरेवाडी, कळंबोली, अंजप, ऊकरुळ, रामाची वाडी, कुंभे, दात्रीवाडी, वाघाची वाडी, पिंगळेवाडी, बोरीवली, नालधे, सराईवाडी, पोखरकरवाडी, कवठेवाडी, खांडपे, चोचीवाडी, नसरापूर आणि धामणी येथील प्राथमिक शाळांमध्ये विद्यार्थ्यांना शैक्षणिक साहित्याचे वाटप करण्यात आले. या सर्व शाळांमध्ये मिळून तब्बल ६२५ दप्तरांसह शाळेसाठी उपयोगी विविध साहित्याचे मोफत वितरण करण्यात आले.
कार्यक्रमाची सुरुवात मान्यवरांच्या हस्ते दीपप्रज्वलन करून करण्यात आली. त्यानंतर संबंधित शाळांच्या मुख्याध्यापकांनी कार्यक्रमाची प्रस्तावना करत सद्भाव फाऊंडेशनच्या या उपक्रमाचे कौतुक केले. उपस्थित मान्यवरांचे पुष्पगुच्छ देऊन स्वागत करण्यात आले. विद्यार्थ्यांच्या चेहऱ्यावर नवीन दप्तर आणि शैक्षणिक साहित्य मिळाल्याचा आनंद स्पष्टपणे दिसून येत होता.
या उपक्रमाला सद्भाव फाऊंडेशनच्या ट्रस्टी मा. नीता दोशी यांची उपस्थिती लाभली. तसेच विविध शाळांमधील मुख्याध्यापक, शिक्षक व शिक्षिका मोठ्या संख्येने उपस्थित होते. फाऊंडेशनच्या वतीने प्रकल्प अधिकारी मा. सुनंदा लाड तसेच प्रगती पाटील, संतोष ढाकवळ आणि प्रतीक्षा दगडे यांनी कार्यक्रमाच्या आयोजनात सक्रिय सहभाग घेतला.
यावेळी सद्भाव फाऊंडेशनच्या प्रकल्प अधिकारी सुनंदा लाड यांनी विद्यार्थ्यांशी संवाद साधत त्यांना पुढील शैक्षणिक वाटचालीसाठी मार्गदर्शन केले. मुलांनी मन लावून अभ्यास करावा, शिक्षणामध्ये सातत्य ठेवावे आणि आपल्या आयुष्यात मोठे ध्येय निश्चित करून ते साध्य करण्यासाठी प्रयत्न करावेत, असा साध्या व सोप्या भाषेत त्यांनी विद्यार्थ्यांना संदेश दिला. शिक्षणाबद्दल विद्यार्थ्यांमध्ये उत्साह वाढावा आणि त्यांचा आत्मविश्वास बळकट व्हावा, यासाठी त्यांनी विविध उदाहरणांच्या माध्यमातून मार्गदर्शन केले.
ग्रामीण व दुर्गम भागातील विद्यार्थ्यांना शिक्षणासाठी प्रोत्साहन देण्याच्या दृष्टीने सद्भाव फाऊंडेशनकडून राबविण्यात आलेला हा उपक्रम निश्चितच कौतुकास्पद ठरला. आर्थिक परिस्थिती प्रतिकूल असलेल्या विद्यार्थ्यांना शैक्षणिक साहित्याची मदत मिळाल्याने त्यांच्या शिक्षणाला हातभार लागणार आहे.
विद्यार्थ्यांना केवळ साहित्य देणे एवढ्यावरच न थांबता त्यांच्यामध्ये शिक्षणाची गोडी, आत्मविश्वास आणि पुढे जाण्याची जिद्द निर्माण करण्याचा प्रयत्न या उपक्रमातून करण्यात आला. शेवटी विद्यार्थ्यांशी संवाद, मार्गदर्शन आणि हसत-खेळत वातावरणात कार्यक्रमाची सांगता करण्यात आली. सद्भाव फाऊंडेशनच्या या सामाजिक उपक्रमाचे पालक, शिक्षक आणि ग्रामस्थांकडून स्वागत करण्यात आले.
