खालापूर नागरिकांचा नगरपंचायत कार्यालयावर हल्ला बोल. वाढीव घरपट्टी वरुन खरडपट्टी.

नगरपंचायत खालापूर हद्दीत नागरिकांवर जुलमी घरपट्टी करवाढ आकारण्यात येत असून करवाढी विरोधात संतापलेल्या नागरिकांनी मुख्याधिकारी कोमल कराळे आणि लोकप्रतिनिधींना जाब विचारला. यावेळी अनेक जबाबदार लोकप्रतिनिधी नागरिकांच्या रोषाचा सामना करावा लागू नये यासाठी गैरहजर राहिले.

नगरपंचायतीकडून घरपट्टी करामध्ये झालेल्या प्रचंड वाढीचा ठराव नगरपंचायत सत्ताधारी यांच्या संमतीने करण्यात आला आहे. ठराव मंजूर करताना नगरसेवक आणि नगरसेविका यांच्या अज्ञानाचा फायदा उचलून संभाव्य घरपट्टीत पाच पट करवाढ करण्याचा प्रस्ताव आहे.

संतप्त, नागरिकांनी मुख्याधिकारी कोमल कराळे, नगराध्यक्षा रोशना मोडवे यांना विचारणा करण्यासाठी नगरपंचायत कार्यालय गाठले. नागरिकांनी प्रश्नाची सरबत्ती करत मुख्याधिकारी यांना जेरीस आणले.

नगरपंचायतीने शालेय विद्यार्थ्यांमार्फत सर्वेक्षण करून घरांच्या क्षेत्रफळावर आधारित कर आकारणी केली आहे. अनेक नागरिकांनी आक्षेप नोंदविला . मात्र त्यानंतर पुनःसर्वेक्षणाबाबत कोणतीही कारवाई करण्यात आलेली नाही. त्या वेळी नगरपंचायतीचे प्रतिनिधीही उपस्थित नव्हते व ठेकेदाराने मनमानी पद्धतीने सर्वेक्षण केले असल्याचे नागरिकांनी निदर्शनास आणत करवाढ रद्द करावी अशी मागणी केली आहे. नागरिकांच्या प्रश्नांना उत्तरे देताना मुख्याधिकारी घामाघूम झाल्या होत्या. घरपट्टी बाबत निर्णय ठोस न केल्यास नगर पंचायत बरखास्त करण्याचा इशारा यावेळी नागरिकांनी दिला आहे.

खोपोलीतील माझ्या एक प्लॅटची घरपट्टी तीन ते साडेतीन हजार येत असून खालापूर मधील एक घराची घरपट्टी मला साडेआठ हजार रुपये आली आहे ही नगर पंचायत ची मोगलाई आम्ही खपऊन घेणार नाही ह्यासाठी आम्ही नगरपंचायत वर कायदेशीर करू.=श्री नवीनदादा घाटवळ जेष्ठ नागरिक

खालापूर नगर पंचायत मध्ये वाढीव घरपट्टी मध्ये जो काही कर आकारला आहे त्यामध्ये शाळा, आरोग्य याबाबत आजही आरोग्य म्हणजे दवाखाना हा जिल्हा परिषद चा आहे आणि प्राथमिक शाळा ही सुद्धा जिल्हा परिषद ची आहे तर मग नगर पंचायत काय सुविधा देते.=श्री उमेश गावंड माजी उपसभापती खालापूर पंचायत समिती 

वाढीव घरपट्टी हा सर्वांच्या जिव्हाळ्याच्या प्रश्न असताना लोकप्रतिनिधी यांना काही पडल्याचे दिसून येत नाही.याबाबत लोकप्रतिनिधी यांचा जाहीर निषेध=श्री दिपक जगताप माजी शहर अध्यक्ष भाजपा तथा सोशल मीडिया प्रमुख खालापूर तालुका भाजपा 

घरपट्टी आकारताना मागे जो सर्वे केला होता तो शाळकरी विद्यार्थ्यांना काम देण्यात आले होते सर्वप्रथम त्या ठेकेदारावर कारवाई करून पुन्हा नव्याने सर्वे करण्यात यावा=ॲड राकेश गव्हाणकर